تيجوا نخلى بيوتنا جنه (الحلقه الثانيه)

السلام عليكم ورحمه الله تعالى وبركاته
اشتاقت نفسى للتحدث معكم اخوتى فالله
فهل يتسع وقتكم لكى نتحدث سويا فى جزء جديد من موضوعنا
ياترى فاكرينه لسه ولا ايه؟
موضوعنا كان ازاى نخلى بيوتنا جنه!!
وازاى نرجع الموده بينا من تانى؟!
بقول لكم ايه فاكرين اخر مره اتجمعنا فيها مع اولادنا وصلينا بيهم جماعه!
طب فاكرين اخر مره اتجمعنا كلنا يوم الجمعه قبل الصلاه وقرينا سوره الكهف!
انا سامعه ناس بتقول ياااااااااه من زمان معملاناش كده!!!!
طب ده ينفع...ليه بقينا نستخسر الخير فبعض
لو كل زوج طلب من زوجته واولاده انه يؤمهم فى صلاه فرد او اتنين فاليوم هيحصل ايه متهيق لى دى احسن حاجه ممكن نتجمع عليها صح! وعلى فكره والله عباده الصلاه بالذات بتقوم على التعود وتقليد اولادنا لينا.
مش الرسول صلى الله عليه وسلم قال(الاقربون اولى بالمعروف)
انا عارفه ان ظروف الحياه بقت صعبه جدا وان اغلبيتنا مش بيشوف اولاده الا نادرا
ليه منخليش الوقت اللى بنقضيه مع بعض وقت جميل نعمل فيه حاجه تنفعنا وتزود صلتنا بربنا سبحانه وتعالى.
ليه بطلنا نشجع اولادنا على حفظ القران والاحاديث واكتفينا بانهم يذاكروها عشان الامتحانات وبس .
وكمان بطلنا نحثهم على لعب الرياضه والقراءه واهتمانا بحاجات ممكن تفيدهم بس فالدنيا بس.
فاكرين حديث الرسول صلى الله عليه وسلم(الدال على الخير كفاعله(.
ليه منخليش اولادنا يستغلوا وقتهم فالعمل للدنيا والدين معا.
عارفين لو اهتمنا بالطاعات البسيطه دى والله هتفرق فحياتنا. كتير قوى.
على الاقل اما بنتوضأ ونصلى بنحس براحه غريبه هتريحنا من كل هموم الدنيا
واما نحث اولادنا على الصلاه ونشجعهم عليها وعلى حفظ القران وتعاليم الاخلاق
الى جانب بعض اللغات وتعلم رياضه مفضله لديهم.
مش هندى لاولادنا فرصه يغلطوا او يعاملونا معامله سيئه لاقدر الله لان احنا كده هنملأ اوقات فراغهم بنشاطات هادفه نافعه فالدنيا والاخره.
وكمان هنقلل حجم المشكلات اللى ممكن تواجهنا بسبب الاولاد لاقدر الله
واللى اهم من كده هيكونوا هما دول الصدقه الجاريه التى تنفعنا بعد الممات
قال صلى الله عليه وسلم(اذا مات ابن ادم انقطع عمله الا من ثلاث صدقه جاريه؛او علم ينتفع به؛او ولد صالح يدعو له.(
(ربى لاتذرنى فردا وانت خير الوارثين)
اللهم متعنا بنعمه الزوج الصالح والزوجه الصالحه وانعم علينا بذريه صالحه ترضى بها عنا.
واخيرا...
قال صلى الله عليه وسلم(كلكم راع وكلكم مسئول عن رعيته)صدق رسول الله صلى الله عليه وسلم.
ياريت نهتم كلنا بالاساس اللى بنبنى عليه بيوتنا عشان نقدر نعدى بيها من كل الازمات لاقدر الله.